മനസ്സിന്റെ ജാലകങ്ങൾ .

നേർത്ത  തിരശ്ശീലക്ൾക്കു ള്ളിലൂടെ
നീ  തന്ന  നിറം  മങ്ങിയക്കാഴ്ചകൾ
ആർക്കാണെന്നും പകൽപ്പൂരങ്ങൾ
ആയിരുന്നത് ?

അടഞ്ഞിരുന്നിട്ടും ,
നേർത്ത  വിടവിലൂടെ
വെളിച്ച  പൊട്ടുകൾ  നീട്ടി
ആരുടെ  ദിവസങ്ങളിലാണ്
നീ , ചിരിത്തിരികൾ
തെളിച്ചത് .?

പൂമുഖ വാതിൽ
ശബ്ദമില്ലാതെ ചാരി
മഴയുടെ  കണ്ണാടിക്കാഴ്ചകൾക്കായ്
ആരാണ്   നിന്നിലേയ്ക്കോടി -
യെത്തിയിരുന്നത്?

 ഈർപ്പം  നിറഞ്ഞ
നിന്റെ  നെഞ്ചിൽ
നേർത്ത  നീണ്ട  വിരലുകളാൽ
ആരായിരുന്നു  പതിവായ്
പ്രണയ ചിത്രങ്ങൾ
വരച്ചത് ?

ഇന്ന് ,
തിമിരം  പടർന്ന്
 അന്ധമായ് പ്പോയ
ക്കാഴ്ചകളിൽ  ഒന്ന് മാത്ര -
മാവാനായിരുന്നെങ്കിൽ
അടഞ്ഞിരുന്നിട്ടും ,
പഴുതുകളിലൂടെ  
വെളിച്ചം  നീട്ടി
എന്തിനാണാ  ജാലകങ്ങൾ
വെറുതെ , ചിരിച്ച്  നിന്നത് ?