പാലായനങ്ങൾ

എന്നോട് പറയാതെയാണ്
മിന്നുന്ന വെയിലിലേയ്ക്കു
നീ , ഇറങ്ങിപ്പോയത് .

എത്ര വഴക്കിട്ടാണ്
പതിഞ്ഞ ഈണത്തിൽ
പാട്ടുമൂളി
നിന്നെയും ക്കൊണ്ട്
ചുറ്റിനടന്ന  കള്ളക്കാറ്റിന്റെ
കയ്യിൽനിന്നും
നിന്നെ തിരികെ വാങ്ങിയത് .

നിലാവ് പെയ്യുന്ന
രാത്രികളിൽ
എന്റെ ചെറിയ ജാലകചതുരം
ശബ്ദമില്ലാതെ  തുറന്ന്
നീ ഇറങ്ങി പ്പോവുന്നത്
ഞാൻ അറിയാറില്ലെന്ന്
കരുതിയോ ..?
കണ്ണിൽ  നോക്കിയിരുന്ന്
നീയും , നിലാവും
കഥപറയുന്നത്  കാണാൻ
എത്ര രാവുകൾ
ഞാൻ  ഉറങ്ങാതെ തീർത്തിരിക്കുന്നു .!!

മഴ മദിച്ചു പെയ്യുന്ന
തുലാവർഷ   നാളുകളിൽ
നനഞ്ഞൊട്ടിവന്ന് ചേർത്തണച്ച്
എത്ര വട്ടമാണ്  നീ എന്നെ
തനുപ്പിച്ചുറക്കിയത്  .....

നിന്റെ സന്തോഷങ്ങൾക്കൊന്നും
'അരുതെ'ന്ന്   പറയാഞ്ഞിട്ടാണോ
മനസ്സേ ,
നീ  വീണ്ടും  എന്നെ ഇങ്ങനെ
കബളിപ്പിയ്ക്കുന്നത് ..?